Collector Office Vadodara

વડોદરા સ્થિત અટલ સાંસદ જનસેવા કેન્દ્ર સરકારી નીતિઓ અને નાગરિકો વચ્ચે સીધા સંપર્ક તરીકે કામ કરતાં આ વિઝનનું ઉત્તમ ઉદાહરણ પ્રસ્તુત કરે છે. તે એવું પ્લેટફોર્મ પ્રદાન કરે છે કે જ્યાં આવશ્યક સેવાઓ અસરકારક રીતે ડિલિવર કરી શકાય છે અને તેનાથી સુનિશ્ચિત કરાય છે કે વિકાસની દિશામાં આગળ વધવામાં કોઇપણ પાછળ રહી ન જાય. (ઓન-કોલ સપોર્ટ માટે 9687872024 ઉપર કેન્દ્રનો સંપર્ક કરો).

અટલ સાંસદ જનસેવા કેન્દ્રની ભૂમિકા

અટલ સાંસદ જનસેવા કેન્દ્ર માહિતીના પ્રસાર તથા વિવિધ સરકારી યોજનાઓ સુધીની પહોંચને સુવિધાજનક બનાવવા માટે એક કેન્દ્ર તરીકે કામ કરે છે. આ પહેલ વિશેષ કરીને વંચિતો માટે સેવાની ડિલિવરીમાં ખાઇને ભરપાઇ કરે છે. વડોદરા જિલ્લાની જનસંખ્યા લગભગ 41.7 લાખ છે, જ્યાં લગભગ 20 ટકા વસતી 336 ઝૂંપડપટ્ટીમાં રહે છે (2005 સર્વે ડેટા). આ કલ્યાણકારી કાર્યક્રમો સુધીની સમાન પહોંચ સુનિશ્ચિત કરવા માટે આ પ્રકારના કેન્દ્રોની આવશ્યકતા રહે છે.

આ કેન્દ્ર આરોગ્યથી લઇને નાણાકીય સશક્તિકરણ સુધીની વિવિધ યોજનાઓ ઓફર કરે છે, જે સમાજના દરેક વર્ગના ઉત્કર્ષ માટે ડિઝાઇન કરાઇ છે. ડિજિટલ ઇન્ડિયા પહેલનો ઉપયોગ કરતાં આ કેન્દ્ર આધાર નોંધણી, આવકનો દાખલો અને આયુષ્માન ભારત કાર્ડની અરજી જેવી પ્રક્રિયાઓને સુવિધાજનક બનાવીને સરકારી યોજનાઓને વધુ સુલભ અને કાર્યક્ષમ બનાવે છે.

આયુષ્માન ભારત મીશન – ડિજિટલ હેલ્થ ઇકોસિસ્ટમની રચના

પ્રધાનમંત્રી જન આરોગ્ય યોજના (પીએમ-જય) તરીકે ઓળખાતી આયુષ્માન ભારત યોજના કેન્દ્ર દ્વારા ઓફર કરાતી સૌથી પરિવર્તનકારી આરોગ્યલક્ષી પહેલો પૈકીની એક છે. આ યોજના 1,350થી વધુ તબીબી પરિસ્થિતિઓમાં વિનામૂલ્ય સારવાર પ્રદાન કરે છે, જેમાં વાર્ષિક રૂ. 5 લાખ સુધીની આક ધરાવતા પરિવારો માટે હોસ્પિટલાઇઝેશન ખર્ચ પણ કવર થઇ જાય છે. આ કેન્દ્રમાં નોંધણીની પ્રક્રિયાને સુવ્યવસ્થિત કરાઇ છે, જ્યાં 70 વર્ષથી ઉપરના વ્યક્તિઓ તેમનું કાર્ડ માત્ર 10 મીનીટમાં પ્રાપ્ત કરે છે, જ્યારેકે અન્યને 10-15 દિવસનો સમય લાગે છે.

આ કેન્દ્રની મુલાકાત દરમિયાન મેં ત્યાંના ઓપરેટર હેતલ ભટ્ટ સાથે ચર્ચા કરી હતી. તેમણે આ સ્કીમ કેવી રીતે લોકોના જીવનમાં પરિવર્તન લાવે છે તેના વિશે રસપ્રદ વિગતો આપી હતી. આવી જ એક વાર્તા શ્રીમતી રંજુ સાબીખીની છે, જેમના માતાએ આ કેન્દ્રમાં આયુષ્માન ભારત કાર્ડ પ્રાપ્ત કર્યુ. તેમણે વિશેષ કરીને કર્મચારીઓની કાર્યક્ષમતા અને પ્રોફેશ્નલાઝિમ સાથે  મદદગાર સ્વભાવની પ્રશંસા કરી હતી. યુવા પેઢીને નાગરિકોને ખંતપૂર્વક મદદ કરતા જોઈને તેમનામાં આશાનો સંચાર થયો. તેમણે કહ્યું હતું કે કેવી રીતે થોડી જ મીનીટમાં કાર્ડની પ્રક્રિયા પૂર્ણ કરાઇ હતી અને આ જોઇને તેઓ સેવાથી અભિભૂત થયાં હતાં.  આવા ઉદાહરણો આરોગ્યસંભાળ અસમાનતાઓને દૂર કરવામાં નીતિની અસરને દર્શાવે છે. [Video Feedback]

મુદ્રા લોન, સ્ટેન્ડ-અપ ઇન્ડિયા અને બીજી સામાજિક સુરક્ષા સંબંધિત યોજનાઓ

સુક્ષ્મ અને લઘુ ઉદ્યોગોને ટેકો આપવા માટે ડિઝાઇન કરાયેલા મુદ્રાન લોન કેન્દ્ર દ્વારા સંચાલિત વધુ એક મહત્વપૂર્ણ કાર્યક્રમ છે. આ પહેલ રૂ. 10 લાખ સુધીની લોન આપે છે, જેનાથી નાના વ્યવસાયના માલિકો, શેરી વિક્રેતાઓ અને ઉભરતાં ઉદ્યોગસાહસિકો તેમના સાહસનો વિકાસ કરી શકે છે. આ સ્કીમને ત્રણ શ્રેણીમાં વિભાજિત કરવામાં આવી છેઃ શિશુ (રૂ. 50,000 સુધીની લોન), કિશોર (રૂ. 50,001થી રૂ. 5,00,000) અને તરૂણ (રૂ. 5,00,001થી રૂ. 10,00,000). કેન્દ્ર ખાતેના ઓપરેટર સાથેની ચર્ચા મૂજબ વડોદરામાં ગ્રામીણ વિસ્તારોના ઘણાં ઉદ્યોગસાહસિકોએ તેમના વ્યવસાયના વિકાસ માટે મુદ્રા લોનનો લાભ લીધો છે.

બીજી તરફ સ્ટેન્ડ-અપ ઇન્ડિયા સ્કીમ ઉદ્યોગસાહસિક સમાનતાને પ્રોત્સાહન આપે છે. તે ઉત્પાદન, સેવાઓ અથવા વેપાર ક્ષેત્રોમાં ગ્રીનફિલ્ડ સાહસો સ્થાપિત કરવા માટે નાણાકીય સહાય પૂરી પાડે છે. દરેક બેંક શાખાને વાર્ષિક ઓછામાં ઓછા બે આવા પ્રોજેક્ટ્સને ટેકો આપવાનો આદેશ આપવામાં આવે છે.

દરેક માટે સુરક્ષાઃ આ કેન્દ્રો વિવિધ કલ્યાણકારી યોજનાઓની સુવિધા પ્રદાન કરે છે, જેથી વંચિત સમૂહોની નાણાકીય અને સામાજિક સુરક્ષા સુનિશ્ચિત કરી શકાય.

• અટલ પેન્શન યોજનાઃ અસંગઠિતક્ષેત્રના કામદારો માટે પેન્શન સ્કીમ
• પ્રધાનમંત્રી જીવન જ્યોતિ વીમા યોજનાઃ 18-50 વર્ષ વચ્ચેના વ્યક્તિઓ માટે જીવનવીમા કવચ
• વિધવા સહાય યોજનાઃ વિધવાઓ માટે નાણાકીય સહાય
• વ્હાલી દિકરી યોજનાઃ બાળકીઓના અભ્યાસ અને લગ્ન માટે સપોર્ટ

ડિજિટલ ઇન્ડિયા દ્વારા નાગરિકો સુધી નીતિઓની પહોંચમાં વધારો

અટલ સાંસદ જનસેવા કેન્દ્રની સફળતા મિનિસ્ટ્રી ઓફ ઇલેક્ટ્રોનિક્સ એન્ડ ઇન્ફર્મેશન ટેક્નોલોજીની ડિજિટલ પહેલને પણ આભારી છે. પ્રક્રિયાઓના ડિજિટાઇઝેશન દ્વારા આ કેન્દ્ર સેવાઓની ઝડપી ડિલિવરી સુનિશ્ચિત કરે છે. વડોદરા માટે આ વિશેષ છે કે જ્યાં વસતીના વિશાળ સમૂહને લાભો લેવામાં મૂશ્કેલીઓનો સામનો કરવો પડતો હતો.

આયુષ્માન ભારત, મુદ્રા લોન અને સ્ટેન્ડ-અપ ઇન્ડિયા જેવા મુખ્ય કાર્યક્રમોની વ્યાપક સુલભતા પ્રદાન કરીને આ કેન્દ્ર વ્યક્તિઓને સ્વસ્થ, વધુ સુરક્ષિત અને આર્થિક રીતે સ્થિર જીવન જીવવા માટે સશક્ત બનાવે છે.

નાગરિકો માટે રાજકીય ગપશપથી આગળ વધતાં આ નીતિઓ વિશે જાગૃકતામાં વધારો થાય તે જરૂરી છે. આ કેન્દ્રમાં ઉપલબ્ધ સેવાઓનો ઉપયોગ કરવા નાગરિકોને પ્રોત્સાહિત કરતાં આપણે સામૂહિકરૂપે સુનિશ્ચિત કરી શકીએ કે સરકાર દ્વારા અપાતા લાભો સમાજના દરેક વ્યક્તિ સુધી પહોંચે. ચાલો, આપણે સકારાત્મક પરિવર્તનનું નેતૃત્વ કરીએ તથા નીતિઓ અને કામગીરી વચ્ચેની ખાઇને દૂર કરીએ.

આ કેન્દ્રની કામગીરી ઉપર દેખરેખ રાખતાં વડોદરાના સાંસદ ડો. હેમાંગ જોશીએ જણાવ્યું હતું કે, અટલ સાંસદ જનસેવા કેન્દ્ર માત્ર કેન્દ્ર જ નહીં, પરંતુ તે દરેક વ્યક્તિને તેમના હકો અને અવસર સુધીની પહોંચ પ્રદાન કરે છે. ભેગા મળીને આપણે એવાં રાષ્ટ્રનું નિર્માણ કરી શકીએ છીએ કે જ્યાં કોઇ પાછળ રહી ન જાય. સૌનો સાથ, સૌનો વિકાસ, સૌનો વિશ્વાસ અને સૌનો પ્રયાસ સૂત્ર સાથે મજબૂત ભારતની રચનાની દિશામાં આપણી સામૂહિક સફર છે.

Connect @bhatt.shivesh / Shivesh Bhatt (Opinion Columnist)

વડોદરાને રાજ્યની સંસ્કારી નગરી, કલા નગરી તરીકેનું ઉપનામ મળ્યું છે. અહિંયાના ગરબા વિશ્વ વિખ્યાત છે તો અહિંયાની કોલેજોમાં તૈયાર થતા આર્ટીસ્ટ દુનિયાભરમાં પોતાનું નામ કમાઇ ચુક્યા છે. પરંતુ શહેરમાં અનેક જગ્યાઓની સ્થિતી બદથી બદતર છે, આ કહેવામાં સહેજ પણ ખોટું નથી. આવી જ એક જગ્યા છે વડોદરાનું રેલવે સ્ટેશનું ગરનાળું. અહિંયાથી પસાર થતા સેંકડો વાહન ચાલકો દુર્ગંધ અને ખખડધજ્જ રસ્તાઓને લઇને રોજ પરેશાન થતા હોય છે. ચોમાસામાં તો અહિંયા ગટર ઉભરાવવાની ઘટનાઓ સામાન્ય બનતી હોય છે. ત્યારે સમસ્યાથી ત્રસ્ત દિવાંગ કિકાણી નામના યુઝરે ટ્વીટર પર રજૂઆત રૂપી ફરિયાદ કરતા લખ્યું કે,

ડીઆરએમ સર, પાલિકાના કમિશનર પાસેથી અલકાપૂરી ગરનાળાના રિડેવલપમેન્ટને લઇને સગડ મેળવો. કલા નગરીમાં આ કદરૂપુ દેખાઇ રહ્યું છે. પાણી દદળે છે. આગ લાગ્યા બાદ અહિંયા કોઇ બ્યુટીફિકેશનના પગલા લેવામાં આવ્યા નથી.

જેના જવાબમાં મ્યુનિસિપલ કમિશનર લખે છે કે, આ જવાબદારી રેલવે ઓથોરીટીની છે. અમે તેમને જાણ કરી દીધી છે.

It comes under @CommissionerVmc hence, kindly provide a suitable reply.

— DRM Vadodara (@DRMBRCWR) June 18, 2023

ઉપરોક્ત ટ્વીટના જવાબમાં ડીઆરએમ વડોદરા જણાવે કે, આ જવાબદારી વડોદરા પાલિકાની છે. યોગ્ય જવાબ જણાવવો

આમ, આ અંગેની સ્પષ્ટ જવાબદારી કોઇ વિભાગ લેવા તૈયાર નથી. વડોદરાના લોકોને કોની જવાબજદારીમાં આવે છે તે વાતથી ઓછી નિસ્બત છે. અને આ સમસ્યાનો સત્વરે નિકાલ આવે તેમાં વધારે રસ છે. હવે તે જોવું રહ્યું કે, આખરમાં જવાબદારી કોની સામે આવે છે. અને જવાબદારી સ્પષ્ટ થયા બાદ નાગરિકોની સુખાકારી માટે શું પગલાં અને કેટલા સમયમાં લેવામાં આવે છે.

18 જૂનનો દિવસ દુનિયામાં ફાધર્સ ડે તરીકે ઉજવાય છે. આમ તો, કોઇ પણ સંતાનનો પહેલો હીરો તેના પિતા જ હોય છે. પિતા એવું પાત્ર છે કે, સંતાનો માટે કેટલું ય જતું કરી દે, છતાં મોંઢામાંથી એક શબ્દ પણ ન કાઢે. આજે વડોદરામાં આવીને વસેલા અને કપરા દિવસો જોયેલા એક પિતાની કહાની તમારા સમક્ષ કરવા જઇ રહ્યું છે.

• ભાવેશના જન્મના આશરે 4 વર્ષ બાદ મારી પત્નીનું નિધન થયું

મુળ મહેસાણા પાસેના ગામના ભરતભાઇ દેવીપૂજક આજથી આશરે 15 વર્ષ પહેલા તેમના પત્ની સાથે વડોદરામાં કામ શોધવા માટે આવ્યા હતા. ભરતભાઇએ જણાવ્યું કે, વડોદરામાં આવ્યા બાદ દુકાનમાં કામ શરૂ કર્યું હતું. ત્યારે હું અને મારી પત્ની ભાડાના મકાનમાં રહેતા હતા. દાંપત્ય જીવન દરમિયાન અમને સંતાનમાં એક પુત્ર ભાવેશ છે. ભાવેશના જન્મના આશરે 4 વર્ષ બાદ મારી પત્નીનું નિધન થયું હતું. ત્યાર પછી જીવનના કપરા દિવસો શરૂ થયા હતા. ક્યારેક કામ મળે અને ક્યારે કામ ન પણ મળે, જેમ તેમ દિવસો પસાર કરતા હતા. આ સમયે મકાનનું ભાડું આપી ન શકવાને કારણે ભાવેશ સાથે રોડ પર આવી જવું પડ્યું હતું. પણ મનમાં એવી ઘગશ કે જે કંઇ થાય મારા સંતાનનું ભણવાનું બંધ ન થવું જોઇએ.

• આજે બેંકની ચોપડી ક્યાં છે તેની ખબર નથી

વધુમાં ભરતભાઇ જણાવે છે કે, રોડ પર આવ્યા બાદ જે કોઇ જમવાનું આપે તે જમી લેતો, કામ મળે તે કરી લેતો હતો. અમારૂ જૂનું બેંક એકાઉન્ટ હતું, તેની ચોપડી પ્લાસ્ટીકની થેલીમાં સાચવીને રાખી હતી. જ્યારે પૈસા મળે તો ત્યાં જઇને જમા કરાવી આવતો હતો. કેટલાય વર્ષો રસ્તા પર જ તડકો, છાંયડો અને વરસાદ વેઠ્યો તે આજે યાદ નથી. મારા દિકરાને ભણવા ગાજરાવાડી વિસ્તારમાં આવેલી સ્કુલમાં ભણવા મોકલ્યો હતો. અને મારા એક પરિચીતના ઘરે તે રહેતો હતો. તેને ભણવામાં જે કંઇ જોઇએ તે હું લાવી આપતો હતો. સમયે સમયે તેને મળવા પણ જતો હતો. આજે બેંકની ચોપડી ક્યાં છે તેની ખબર નથી.

• તેઓ સારા હતા એટલે તેમણે ત્યાં એડમિશનની વ્યવસ્થા કરી આપી

વર્ષો પહેલા એક દિવસ મારો દિકરાને શાળામાં રજા હોવાથી અમે બંને ફૂટપાથ પર બેઠા હતા. તેવામાં કોઇ સરકારી અધિકારી આવ્યા હતા. અને તેમણે મારા બાળકને રહેવાની સુવિધાઓ વાળા બાળ ગોકુલમમાં એડમિશન અંગે વાત કરી હતી. તેઓ સારા હતા એટલે તેમણે ત્યાં એડમિશનની વ્યવસ્થા કરી આપી હતી. ત્યારથી મારો દિકરો બાળ ગોકુલમમાં રહીને ભણે છે. અને રજા હોય તે દિવસે હું અચુક તેને મળવા જાઉં છું.

• ફૂટપાથની જગ્યાએ મને અહિંયા સુવિધાસભર શેલ્ટર હોમમાં જોઇને ખુબ ખુશ થયો

અત્યારે મારો દિકરો ધો. 8 માં આવ્યો છે. અત્યાર સુધીમાં તે એક પણ વખત નાપાસ નથી થયો. પહેલા હું ફૂટપાથ પર દિવસો કાઢતો હતો, હવે શ્રવણ સેવા ફાઉન્ડેશન થકી હું પાલિકાના અટલાદરા શેલ્ટર હોમમાં રહું છું. થોડાક સમય પહેલા જ મારા દિકરાનું વેકેશન હોવાથી તે અહિંયા આવ્યો હતો. અને ફૂટપાથની જગ્યાએ મને અહિંયા સુવિધાસભર શેલ્ટર હોમમાં જોઇને ખુબ ખુશ થયો હતો.

• પુત્રનું સ્વપ્ન પૂર્ણ કરવા હું તેને તમામ મદદ કરીશ

મારો દિકરો મોટો થઇને આર્મીમાં જવા ઇચ્છે છે. તેનું સ્વપ્ન પૂર્ણ કરવા હું તેને તમામ મદદ કરીશ. તાજેતરમાં મારો દિકરો વેકેશનમાં મારી સાથે રહેવા આવ્યો ત્યારે તેને શ્રવણ સેવા ફાઉન્ડેશનમાં ઇન્ટરર્ન વિદ્યાર્થીઓએ શીખવ્યું હતું. તે વધુ સારા માર્કસ કેવી રીતે મેળવે, તથા ગણીત અને વિજ્ઞાનના વિષયોને રસપૂર્વક સમજાવ્યા હતા. વેકેશનમાં મારો પુત્ર બિમાર થતા તેને નિરવભાઇ ઠક્કર અને શ્રવણ સેવા ફાઉન્ડેશન દ્વારા જરૂરી દવાઓ અને સારવાર પણ કરાવી આપવામાં આવી હતી. હવે મારા પુત્રને ભણાવવું તે જ મારા જીવનનું એકમાત્ર લક્ષ્ય છે.

પ્રાપ્ત વિગતો અનુસાર વડોદરાના નવાપુરા વિસ્તારમાં આર.વી.દેસાઈ રોડ ખાતે આવેલી સાધના કોલોનીમાં રહેતા વિરાટસિંહ શિવરાજસિંહ વાઘેલા વકીલાતના વ્યવસાય સાથે જોડાયેલા છે. તેમના દ્વારા યુનાઈડેટ વે ઓફ બરોડના સંચાલકો સામે ગ્રાહક સુરક્ષા કોર્ટમાં ફરિયાદ નોંધાવી છે. વડોદરાના ગ્રાહક સુરક્ષા કોર્ટના જજ સમક્ષ રજુઆત કરતાં ફરીયાદી જણાવ્યું હતું કે, યુનાઈટેડવેના સંચાલકો દ્વારા આ વર્ષે કલાલી વડોદરા ખાતે આવેલું એક મેદાન ભાડેથી લઈ ત્યાં ગરબાનું આયોજન કર્યું છે. અને આ વર્ષે તેઓ દ્વારા ગરબા રમવા માટે ખેલૈયાઓ પાસેથી ડોનેશનના નામ પર ફરજીયાત પાસ છપાવી તે પાસ માટે રૂ.4838 (પુરુષ) એક વ્યક્તિ દિઠ ઉઘરાવીને આયોજન કર્યું છે. હું શહેર વડોદરામાં વકીલાતનો વ્યવસાય કરું છું. તાજેતરમાં યુનાઈટેડ વે સંસ્થા પાસેથી મારા અને મારા ઘરના સભ્યો માટે મે ઓનલાઈન પાસ બુક કરાવ્યા હતા.
તેમણે વધુમાં જણાવ્યું કે, ગઈ કાલે નવરાત્રીની પહેલી જ રાત્રે હું અને મારો પરિવાર ગરબા રમવા માટે યુનાઈટેડવેના ગરબા ગ્રાઉન્ડમાં પહોંચ્યા હતા. ત્યારે તે સમયે ગરબા ગ્રાઉન્ડમાં કોઈ પણ જાતની સાફ સફાઈ કરેલી ન હતી. અને આજુબાજુમાં જંગલી ઝાડીઓ પણ ઉગેલ હતી. જેથી અમને અને અન્ય ગરબા ખેલૈયાઓને ગરબા રમતા સમયે પગમાં મોટા મોટા પથ્થરો વાગ્યા હતા. જેના કારણે મારા અને મારા પરિવારના સભ્યોના પગમાં પથ્થરો વાગવાના કારણે સોજા આવી ગયા છે. જે બાબતની જાણ મે સદર સંસ્થાના સંચાલકોને કરી હતી. પરંતુ યુનાઈટેડવે ના સંચાલકો દ્વારા અમારી સાથે ઉદ્ધતાઈ ભર્યું વર્તન કર્યું હતું. તેઓએ અમને કહ્યું કે, સંસ્થા પાસે એટલી રકમ જમાં થયેલી નથી કે ગ્રાઉન્ડની સાફ સફાઈ કરી શકાય. અને સદર ગ્રાઉન્ડ ભાડેથી લીધેલુ છે. જેથી અમારાથી વધુ કોઈ સુખ સુવિધા કરી શકાય નહીં. જેથી તમારે થોડા દિવસ રાહ જોવી પડશે અને જો તમોને રાહ જોવી ન હોય તો બીજા વધઉ રૂપિયાની વ્યવસ્થા કરી આપો. તો આ ગ્રાઉન્ડ વ્યવસ્થિત રીતે સાફ સફાઈ થઈ જાય.

આ સમયે તેઓને જવાબ આપતા અમે કહ્યું કે, જ્યારે આ ગ્રાઉન્ડ માટે પાસ બુક કરતા હતા તે સમયે અમને જણાવાયું હતું કે આ રકમ સંસ્થાના હિત માટે અને જરૂરીયાત મંદ વ્યક્તિઓ માટે વસુલ લેવામાં આવે છે. જેથી આ વખતે રૂ.4838 કિંમત વસુલ કરીએ છીએ. તમે જ્યારે ગ્રાઉન્ડમાં ગરબા ગાવા આવશો તો તમને ગ્રાઉન્ડ ચોખ્ખુ મળશે અને ગ્રાઉન્ડમાં ઘણી બધી સુવિધાઓ પણ રાખેલ છે. પરંતુ નવરાત્રીના પહેલા જ દિવસે ગ્રાઉન્ડમાં કોઈ પણ જાતની સુખ સુવિધા જણાઈ આવેલ નહીં. અને જ્યારે ગરબા ગાવાની શરૂઆત કરી તો અમારા પગમાં ગ્રાઉન્ડમાં પડેલા ઘણા જ મોટા પ્રમાણમાં પથ્થરો અને જંગલી ઝાડીઓ વાગ્યા હતા. જેના કારણે અમારા પગમાં સોજા આવી ગયા છે.
વિરાટસિંહ વાઘેલાએ વધુમાં ફરિયાદમાં જણાવ્યું કે, યુનાઈટેડવે દ્વારા માંગણી મુજબની રકમ આપેલ હોવા છતાં ખેલૈયાઓને કોઈ પણ જાતની સુવિધાઓ મળેલી નથી. અને જ્યારે આ બાબતે અમે સંસ્થાના ઓર્ગેનાઈઝરને રજૂઆત કરી, તો તેઓએ અમારી સાથે ઉધ્ધતાઈ ભર્યુ વર્તન કર્યું હતું. અને અમને કહ્યું કે, તમારા પૈસા તમને પાછા મળશે નહીં, આવું તો થાય તમારે ચલાવવું પડશે. જેથી ફરિયાદી દ્વારા ગ્રાહક સુરક્ષા કોર્ટમાં યોગ્ય વળતર મેળવવા માટે રજુઆત કરાઈ છે. જેમાં ફરિયાદીએ તેઓને માનસીક રીતે થયેલ હેરાનગતિના, ઉપરાંત ગરબા રમવા માટે ખરીદ કરેલ ટ્રેડીશનલ કપડાના ખર્ચ અને સીટી વિસ્તારમાંથી કલાલી જવા આવવાના વળતરની રકમ યુનાઈટેડવેના સંચાલકો પાસેથી વસુલ કરી અપાવવા માટે રજુઆત કરાઈ છે. આ સાથે રૂ. 2 લાખની રકમ વળતર પેટે સંચાલકો પાસેથી વસુલ કરી તેને ગ્રાહક વેલફેર ફંડમાં જમા કરાવવામાં આવે. અને ફરિયાદના ખર્ચના રૂ.25 હજાર અમને અપાવવા માટે ફરિયાદીએ માંગ કરી છે.
ઉલ્લેખનીય છે કે આ બનાવને લઈને ગઈ કાલે ખેલૈયાઓ દ્વારા ગરબા ગ્રાઉન્ડમાં જ પથ્થર પથ્થરના નારા લગાવવામાં આવ્યા હતા. જેના વીડિયો સોશિયલ મીડિયામાં ખૂબ જ વાયરલ થયા છે. ત્યારે હવે આ મામલે ફરિયાદ થતા ગ્રાહક સુરક્ષા કોર્ટ દ્વારા શું કાર્યવાહી કરવામાં આવે છે તે જોવાનું રહ્યું.

67 દિવસ સુધી સંસ્કૃત ભાષાની ઘનિષ્ઠ તાલીમ અપાઇ

ગુજરાત પ્રવાસનને વૈશ્વિક ફલક પર લઇ જનાર સ્ટેચ્યુ ઓફ યુનિટી પરિસરમાં રેડિયો યુનિટી 90 FM લોકો વચ્ચે આકર્ષણનું કેન્દ્ર રહ્યું છે. અહીં સ્થાનિક આદિવાસી યુવક અને યુવતીઓ આર.જે બનીને પ્રવાસીઓનું મનોરંજન અને જ્ઞાનવૃદ્ધિ કરાવે છે. તેમના ઉત્સાહમાં ઉમેરો કરવા અને સંસ્કૃત ભાષાનું મહત્વ વધારવા માટે 12 ઓગસ્ટના ‘વિશ્વ સંસ્કૃત દિવસ’ પર આખો દિવસ રેડિયો યુનિટી પર સંસ્કૃત ભાષામાં પ્રસારણ કરવામાં આવશે અને સાથે તેનું અનુવાદ પણ કરવામાં આવશે જેથી શ્રોતાઓ સરળતાથી સમજી શકે. આ દિવસે રેડિયો યુનિટી પર નર્મદાષ્ટકની સંસ્કૃતમાં સમજ આપવામાં આવશે સાથે જ સંસ્કૃત-એક વૈજ્ઞાનિક ભાષા, સરદાર સાહેબના જીવન ચરિત્ર અને તેમણે દેશને એક કરવામાં આપેલ યોગદાન પર ચર્ચા કરવામાં આવશે. એકતા નગરના તમામ આકર્ષણો અંગે પણ સંસ્કૃતમાં રજૂઆત કરવામાં આવશે.

*સ્થાનિક અને આદિવાસી યુવક/યુવતી બન્યા રેડિયો જૉકી*

રેડિયો યુનિટીમાં રેડિયો જોકી તરીકે અહીંના સ્થાનિક એવા ગુરુચરણ તડવી, હેતલ પટેલ, ડૉ. નીલમ તડવી અને ગંગા તડવી કામ કરી રહ્યાં છે. સૌ પ્રથમ તમામને સંસ્કૃત ભાષાની તાલીમ આપીને આર.જે તરીકે પસંદગી કરવામાં આવી હતી. આગાઉ ‘મન કી બાત’માં પીએમ મોદીએ પણ આદિવાસી યુવક યુવતીઓના કામની સરાહના કરી હતી.

સ્ટેચ્યુ ઓફ યુનિટીના જનસંપર્ક અધિકારી રાહુલ પટેલે જણાવ્યું કે, “પ્રધાનમંત્રી શ્રી નરેન્દ્રભાઇ મોદીની પરિકલ્પનાથી કોમ્યુનિટી રેડિયો ‘રેડિયો યુનિટી’ સાકાર થયું છે. વિશ્વ સંસ્કૃત દિવસની ઉજવણીના ભાગરૂપે આ વર્ષે પણ દિવસભર સંસ્કૃતમાં વાત કરવામાં આવશે.” રેડિયો યુનિટીમાં RJ અને આરોગ્ય વનમાં ગાઈડ તરીકે કાર્ય કરતા હેતલ પટેલે જણાવ્યું કે, “ભારત દેશ વિવિધતામાં એકતાનો સંદેશો આપે છે, જેમાં ભાષાની વિવિધતામાં પણ એકતા મુખ્ય છે. સંસ્કૃત ભાષા તમામ ભાષાઓની જનની છે ત્યારે રેડિયો યુનિટી 90 FM પર અમને સંસ્કૃતમાં પણ અમને વાત રજૂ કરવાનો મોકો મળે છે, જે અમારા માટે ગૌરવની બાબત છે.  ”

અમે અમારી વાત સંસ્કૃતમાં કાંઈક આવી રીતે રજૂ કરીએ છીએ…
“भवनतः श्रुणवन्ति रेडियो यूनिटी नवति एफएम मम इत्युक्ते हेतल सह एक भारतम श्रेष्ठ भारतम””

*15 દિવસ વારાણસીમાં સંસ્કૃત ભાષાની ઘનિષ્ઠ તાલીમ લીધી*

એકતા નગરમાં અત્યારે કુલ 108 ગાઈડ કામ કરી રહ્યાં છે જેમાંથી 15 ગાઈડને સંસ્કૃત ભાષાની 52 દિવસની તાલીમ સોમનાથ સંસ્કૃત યુનિવર્સિટી અને સંસ્કૃત ભારતીના સહયોગથી એકતા નગર ખાતે આપવામાં આવી હતી. ત્યારબાદ આ 15 ગાઈડને ઘનિષ્ઠ તાલિમ માટે વારાણસી મોકલવામાં આવ્યા હતાં. આ અંગે વાત કરતા આર.જે અને આરોગ્ય વનના ગાઈડ તરીકે કાર્ય કરતા ગુરૂચરણ તડવી જણાવે છે કે, “વિવિધ 6 ભાષામાં માહિતી આપતા ગાઈડ અત્રે સેવાઓ આપી રહ્યાં છે. અમને 52 દિવસ એકતાનગર ખાતે અને 15 દિવસ કાશી ખાતે સંસ્કૃતની વ્યાપક તાલીમ આપવામાં આવી અને હવે અમારી પસંદગી રેડિયો યુનિટી પર રેડિયો જોકી તરીકે કરવામાં આવી છે. હવે ગુજરાતી હિન્દી અને અંગ્રેજીની સાથે અમે સંસ્કૃતમાં પણ માહિતી આપીએ છીએ.”   રેડિયો પર 6 અન્ય ભાષાઓ – ગુજરાતી, હિન્દી, અંગ્રેજી, તેલુગુ, મરાઠી અને કન્નડમાં પણ પ્રવાસીઓને માર્ગદર્શન આપવામાં આવી રહ્યું છે.

આ વર્ષના પ્રારંભમાં તે 100થી 151ના સ્લેબમાં જતી રહી છે. ભારત સરકારના શિક્ષણ મંત્રાલય દ્વારા વિવિધ શૈક્ષણિક સંસ્થાઓના રેન્કિંગની જાહેરાત કરવામાં આવી હતી. તેમા દેશભરમાં સાત હજારથી વધારે ઇન્સ્ટિટ્યુશન્સને આવરી લેવાયા હતા. તેમા વડોદરાની મહારાજા સયાજીરાવ ગાયકવાડ યુનિવર્સિટીનું NIRF રેન્કિંગ ઓવર ઓલ કેટેગરીમાં 151થી 200માં ઉતરી ગયુ છે.

એમએસયુએ યુનિવર્સિટી લેવલે 101થી 150ના સ્લેબમાં પોઝિશન મેળવી છે. જ્યારે ફેકલ્ટી ઓફ ફાર્મસી 24મી રેન્ક પર હતી. આ ઉપરાંત ફેકલ્ટી ઓફ ટેકનોલોજી 117મી રેન્ક પર હતી. કેન્દ્ર સરકારા શિક્ષણ મંત્રાલયે નેશનલ ઇન્સ્ટિટ્યુટ ઓફ રેન્કિંગ ફ્રેમવર્ક NIRF દ્વારા દેશભરની શિક્ષણ સંસ્થાઓ માટે નેશનલ રેન્કિંગની જાહેરાત કરી હતી. તેમા ઓવરઓલ અને ફેકલ્ટી સ્તરે મહારાજા સયાજીરાવ ગાયકવાડ યુનિવર્સિટીનો દેખાવ ગયા વર્ષની તુલનાએ નબળો રહ્યો છે. એકમાત્ર ફાર્મા ફેકલ્ટી સારો દેખાવ કરવામાં સફળ રહી છે.

ફેકલ્ટી ઓફ ફાર્મસીએ નેશનલ લેવલ પર 16મું સ્થાન મેળવ્યું છે. NIRF દ્વારા આ રેન્કિંગ ટીચિંગ, લર્નિગ, રિસર્ચ અને પ્રોફેશનલ પ્રેક્ટિસ, ગ્રેજ્યુએશન આઉટ કમ, આઉટરિચ એન્ડ ઇન્ક્લુઝિવિટી પરસેપ્શન સહિતના માપદંડના અવલોકન અને અભ્યાસના આધારે અપાય છે.

આ રેન્કિંગ દર્શાવે છે એમ એસ યુનિવર્સિટીએ રેન્કિંગના મોરચે કેવો ધબડકો કર્યો છે. સ્વાભાવિક રીતે યુનિવર્સિટીના સત્તાધીશો માટે આ રીતે રેન્કિંગમાં પછડાટ ઘણો ચિંતાનો વિષય રહ્યો છે. આ કથળતા જતા દેખાવને સુધારવા પગલાં ભરવા જરૂરી હોવાનું તે માને છે.

● આ વખતે ભાજપના શહેર પ્રમુખ અને મહામંત્રીઓ તેમજ ધારાસભ્યોને પણ બેગ આપવાનું નક્કી કર્યું છે.

● વડોદરા મ્યુનિસિપલ કોર્પોરેશનમાં ક્રિકેટની ટીમ પાછળ રૂપિયા 12 થી 15 લાખ નો વાર્ષિક ખર્ચ થતો હોય છે.

વડોદરા મ્યુનિસિપલ કોર્પોરેશન દ્વારા બજેટ બેઠક બાદ તમામ કોર્પોરેટરોને બેગ આપવાની પ્રણાલિકા રહેલી છે જેમાં આ વખતે કોર્પોરેશનના ઇતિહાસમાં પ્રથમ વખત ધારાસભ્યો, ભાજપના પ્રમુખ અને મહામંત્રીઓ ને પણ બેગ આપવાની પ્રથા શરૂ થતાં વિવાદ થયો છે.

વડોદરા મ્યુનિસિપલ કોર્પોરેશન દ્વારા દર વર્ષે બજેટ બેઠક બાદ કોર્પોરેશનના તમામ 76 કોર્પોરેટરોને સારી ક્વોલિટીની અને મોંઘી બેગ આપવામાં આવતી હતી તેમાં આ વખતે વધારો કરી બેગ આપવાનો નિર્ણય કર્યો હતો જેની બેગની ₹ 11000 ની કિંમત થાય છે તદુપરાંત ભાજપના શહેર પ્રમુખ અને મહામંત્રીઓ તેમજ ધારાસભ્યોને પણ બેગ આપવાનું નક્કી કર્યું છે. જેની પાછળ અંદાજે ₹ 38 લાખનો ખર્ચ થશે.

અત્રે એ યાદ અપાવવું જરૂરી છે કે કોર્પોરેશનના અધિકારીઓ અને કોર્પોરેટરોને અત્યાર સુધી બેગ આપવામાં આવતી હતી પરંતુ થોડાક વખત પહેલાં વિવાદ થતાં અધિકારીઓને બેગ આપવાની પ્રથા બંધ કરી હતી ત્યારબાદ કોર્પોરેશનના ઇતિહાસમાં પહેલી વખત ભાજપના શહેર પ્રમુખ, પાંચ ધારાસભ્યો અને પક્ષના ત્રણ મહામંત્રીને પણ બેગ આપવાની પ્રથા શરૂ થતાં રાજકીય મોરચે ચર્ચાનો વિષય બન્યો છે.

ક્રિકેટ પાછળ કોર્પોરેશનની ટીમો તૈયાર કરવા લાખોનો ખર્ચો

વડોદરા મ્યુનિસિપલ કોર્પોરેશનની 2 ક્રિકેટ ટીમો હાલમાં સક્રિય છે જેમાં મેયર ઇલેવન અને મ્યુનિસિપલ કમિશનર ઇલેવનની ટીમોને તૈયાર કરવા પ્રેક્ટિસ અને તેઓને ક્રિકેટની કીટ આપવા પાછળ દર વર્ષે લાખો રૂપિયાનો ખર્ચ કરવામાં આવે છે.

વડોદરા મ્યુનિસિપલ કોર્પોરેશનમાં ક્રિકેટની ટીમમાં પસંદગી માટે પણ વહાલા દવલાની નીતિ ચાલતી હોય છે ત્યારબાદ ક્રિકેટ મેચ હોય ત્યારે તેઓની પ્રેક્ટિસ કરવાથી માંડી ક્રિકેટની કીટ પણ બંને ટીમના ખેલાડીઓને આપવામાં આવતી હોય છે. જેની પાછળ રૂપિયા 12 થી 15 લાખ નો વાર્ષિક ખર્ચ થતો હોય છે.

આ વર્ષે ગુજરાતના મ્યુનિસિપલ કોર્પોરેશનની ક્રિકેટ મેચ સુરત ખાતે યોજાનાર છે ત્યારે તેની પૂર્વ તૈયારીના ભાગરૂપે બંને ટીમના ખેલાડીઓને માત્ર કીટ પાછળ જ રૂ. દસ લાખનો અંદાજીત ખર્ચ થવાનો છે તેમ જાણવા મળે છે.

Source : Gujarat Samachar

● ગતરોજ વડોદરામાં સ્ટેટ મોનીટરીંગ સેલની ટીમે ઉર્મી સ્કુલ પાછળ દરોડા પાડ્યા હતા

● દરોડામાં ટોળાએ પોલીસ પર પથ્થર-દંડા વડે હુમલો કરી મુદ્દામાલ અને અટકાયત કરેલા ઇસમને છોડાવી ગયા,સમગ્ર મામલે સમા પોલીસ સ્ટેશનમાં 8 લોકો સામે ફરિયાદ નોંધાઇ

નિર્લિપ્ત રાયને સ્ટેટ મોનીટરીંગ સેલમાં મુક્યા બાદથી રાજ્યમાં ઠેર ઠેર દારૂ અને જૂગારના ધામો પર દરોડા પાડવામાં આવી રહ્યા છે. પરંતુ ગતરોજ વડોદરામાં સ્ટેટ મોનીટરીંગના બુટલેગરને ત્યાં દરોડામાં હુમલો થવાની ઘટના પ્રથમ વખત ઘટી છે. આ મામલે શહેરના સમા પોલીસ સ્ટેશનમાં 8 લોકો સામે ગુનો નોંધાયો છે. અને હાલ પોલીસે આરોપીઓની પકડવાના ચક્રોગતિમાન કર્યા છે.
તાજેતરમાં રાજ્યમાં ઉચ્ચ પોલીસ અધિકારીઓની બદલી કરવામાં આવી છે. જેમાં ગુનેગારોમાં તથા ખોટું કરનારાઓમાં જેમનો ફફડાટ છે તેવા નિર્લિપ્ત રાયને સ્ટેટ મોનીટરીંગ સેલમાં મુકવામાં આવ્યા છે. સ્ટેટ મોનીટરીંગમાં તેઓની નિમણુંક બાદ ઠેર ઠેર દારૂ અને જૂગારના અડ્ડાઓ પર ટીમો ત્રાટકીને સઘન કામગીરી કરી રહી છે. તેવામાં ગતરોજ સ્ટેટ મોનીટરીંગ સેલના જવાનોએ ઉર્મી સ્કુલ પાસે ચાલતા બુટલેગરના ધંધા પર દરોડા પાડ્યા હતા. જેમાં સ્ટેટ મોનીટરીંગ સેલના જવાનો પર લોકોએ હુમલો કરતા સમા પોલીસ સ્ટેશનમાં ગુનો નોંધાયો છે.

પોલીસ ફરિયાદ મુજબ, પીએસઆઇ સુરેશભાઇ રાઠવા સ્ટેટ મોનીટરીંગ સેલમાં કામગીરી કરે છે. ગતરોજ બાતમીની આધારે તેઓની ટીમે વડોદરાના સમા પોલીસ સ્ટેશન હદ વિસ્તારમાં આવેલા ઉર્મી સ્કુલ પાછળ ઝુપડપટ્ટીમાં ચાલતા બુટલેગર ધિરજ પાંડેને ત્યાં દરોડા પાડ્યા હતા. દરોડા ટાણે ઝાડી ઝાખરામાં ત્રણ ઇસમો જમી પર બેસીને પાસે દારૂ રાખ્યો હોવાનું જોવા મળ્યું હતું. ટીમોએ ત્રાટકીને બેની દારૂ સાથે અટકાયત કરી હતી. અને તેની પુછપરછ કરવામાં આવી હતી. તથા અન્ય એક નાસી છુટવામાં સફળ રહ્યો હતો. પુછપરછ દરમિયાન અટકાયત કરાયેલા દિલીપ ડામોરે જણાવ્યું કે, દારૂ ધિરજ પાંડેનો છે. મને અહિંયા દારૂ વેચવા માટે બેસાડ્યો છે. દરમિયાન આ અંગેની જાણ સમા પોલીસ સ્ટેશનમાં કરવામાં આવી હતી.
પંચનામાની કાર્યવાહી ચાલી રહી હતી, તેવામાં દુરથી ટોળું ભેગું થઇને પોલીસ કર્મીઓ સામે આવ્યું હતું. દરમિયાન દિલીપે બુમો પાડી કહ્યું કે, મને પોલીસે પકડી લીધેલો છે. જેથી તેની પત્ની અને પુત્રી સાથે ટોળું તેના તરફ આવ્યું અને સ્ટેટ મોનીટરીંગ સેલના જવાનો પર દંડા અને પથ્થરો મારવાનું શરૂ કરી દીધું હતું. જેમાં દિલીપને છોડાવી સ્ટેટ મોનીટરીંગની કાર્યવાહી દરમિયાન જપ્ત કરેલો દારૂનો જથ્થો લઇને નાસી ગયા હતા. જતા જતા ટોળાએ દરોડાની ટીમની કારને પણ નુકશાન કર્યું હતું. આ અંગેની જાણ કરાતા સમા પોલીસ સ્ટેશનના જવાનો ઘટના સ્થળે આવી ગયા હતા. અને ટોળાને શોધવાના પ્રયાસો કર્યા હતા. જેમાં નિષ્ફળતા મળી હતી.
આખરે સામા પોલીસ સ્ટેશનમાં ધિરજ પાંડે, દિલીપ મનાભાઇ ડામોર, મોબાઇલ નંબર 95**1559** ધારક, મોબાઇલ ધારક, દિલીપ ડામોરની પત્ની અને દિકરી, મોપેડ નંબરના આધારે 2 લોકો મળીને કુલ 8 લોકો સામે ફરિયાદ નોંધાઇ છે. હવે આ મામલે કેટલી જલ્દી બુટલેગર તથા અન્ય ઝડપાય છે તેના પર સૌ કોઇની નજર રહેલી છે.

• નીકીર કેર ફાઉન્દ્વાડેશન દ્રારા શહેરવાસીઓ સુધી 1 કરોડ ડોઝ નિઃશુલ્ક પહોંચે તેવું સુંદર આયોજન કર્યું છે.
• શહેરવાસીઓને હોમિયો કોરોના કવચ નિઃશુલ્ક પૂરું પાડવા માટે અમારી ટિમ તૈયાર છે.
• કારેલીબાગ અને નિઝામપુરા ખાતે આવેલા સેન્ટર પરથી નિઃશુલ્ક હોમિયો કોરોના કવચના ડોઝ મળી રહેશે.

હોમીયોપેથીક દવાની અસરકારક્તાને ધ્યાને રાખીને કોરોના મહામારી કાળમાં કેન્દ્ર સરકારના આયુષ મંત્રાલય દ્વારા તેને પ્રિવેંટિવ ડોઝ તરીકે લઈ શકાય તે વાત પર મહોર મારી છે. કોરોનાની સંભવિત ત્રીજી વેવ સામે લડવાની તંત્ર તૈયારીઓ કરી રહ્યું છે ત્યારે વ્યવસાયે હોમિયોપેથીક (એમ.ડી) ડોકટર તથા વડોદરાની પાલિકાની હેલ્થ કમિટીના ચેરમેન અને વોર્ડ ૩ ના કાઉન્સિલર ડો. રાજેશ શાહ (નિકીર) દ્વારા શહેરવાસીઓ સુધી 1 કરોડ ડોઝ નિઃશુલ્ક પહોંચે તેવું સુંદર આયોજન કર્યું છે.

ડો. રાજેશ શાહ જણાવે છે કે, કોરોનાની મહામારીના પહેલા તબક્કામાં શહેરવાસીઓને હોમિયો કોરોના કવચ ગણાતી દવાના 45 લાખ ડોઝ નિઃશુલ્ક પહોંચાડ્યા હતા. જેની પાછળનો ઉદ્દેશ્ય માત્ર અને માત્ર શહેરવાસીઓને કોરોના સામે લડવા માટે સક્ષમ બનાવવાનો હતો. દરમિયાન અનેક સેવાકીય સંસ્થા તથા અન્ય લોકો મારફતે પણ મોટી સંખ્યામાં હોમિયો કોરોના કવચના ડોઝ પહોંચાડ્યા હતા. હવે કોરોનાની સંભવિત ત્રીજી વેવની તૈયારીઓ ચાલી રહી છે ત્યારે ફરી શહેરવાસીઓને હોમિયો કોરોના કવચ નિઃશુલ્ક પૂરું પાડવા માટે અમારી ટિમ તૈયાર છે. તબક્કાવાર રીતે લોકો સુધી 1 કરોડ ડોઝ પહોંચશે.

ડો. રાજેશ શાહ વધુમાં જણાવે છે કે, 11 જાન્યુઆરીથી કારેલીબાગ અને નિઝામપુરા ખાતે આવેલા સેન્ટર પરથી નિઃશુલ્ક હોમિયો કોરોના કવચના ડોઝ મળી રહેશે. સમગ્ર તૈયારીઓ પાછળ અમારા નિકિર કેર ફાઉન્ડેશનની ટીમે સખત મહેનત કરી છે. કોરોનાની બીજી વેવ સુધીમાં અમારી ટીમે 55 લાખ જેટલા ડોઝ લોકો સુધી પહોંચાડ્યા હતા. હવે વધુ 45 લાખ ડોઝ પહોંચાડવા અમે તૈયાર છીએ.

ડો. રાજેશ શાહ આખરે જણાવે છે કે, આવનારા સમયમાં વધુ ડોઝ આપવા પડે તો પણ અમે તૈયાર છીએ. શહેરવાસીઓને કોરોના સામે રક્ષણ મળે તે જ અમારો ઉદ્દેશ્ય છે.

નિઃશુલ્ક “હોમિયો કોરોના કવચ” મેળવવાનું સ્થળ

૧) જન સંપર્ક કાર્યાલય
૧૦૨, વિનાયક સ્કવેર, મુક્તાનંદ પાસે, આમ્રપાલી શોપીંગ સેન્ટર સામે, કારેલી બાગ, વડોદરા
સમય: સવારે ૧૦-૦૦ થી ૧૨-૦૦ (રવીવારે રજા)

૨) નીકીર કલીનીક
નિઝામપુરા ગામ ચાર રસ્તા
નિઝામપુરા, વડોદરા.
સમયઃ સવારે ૧૦-૦૦ થી ૧૨-૦૦

● ગઈ મોડીરાત્રે વોર્ડ નં.14ના ભાજપ મહિલા કાઉન્સિલર જેલમ બેન ચોકસીના પુત્ર કુણાલ ચોકસી દારૂ પીધેલી હાલતમાં ઝડપાઈ જતા સીટી પોલીસ સ્ટેશનમાં લઈ જવામાં આવ્યો હતો.

● હોબાળો મચાવતા મહિલા કોર્પોરેટર અને પોલીસ વચ્ચે ઉગ્ર બોલાચાલી પણ થઈ હતી એટલું જ નહીં એક પોલીસ કર્મચારી નું જેકેટ પણ ખેંચાતાણીમાં ફાટી ગયું હતું

થર્ટી ફર્સ્ટની ઉજવણીને ધ્યાનમાં રાખી પોલીસ કમિશનરની સૂચનાથી વડોદરા શહેરના અલગ અલગ વિસ્તારોમાં પોલીસે સઘન ચેકિંગ કર્યું હતું એટલું જ નહીં ફતેગંજ વિસ્તારમાં તો મુખ્ય રસ્તા ઉપર બેરીકેટ મૂકી રસ્તો બંધ કરી દઈ થર્ટી ફર્સ્ટની ઉજવણી પર પ્રતિબંધ મૂકી દીધો હતો.

ગઈકાલે મોડી રાત્રે  ચાર દરવાજા વિસ્તારમાં પોલીસે ચેકિંગ હાથ ધર્યું હતું તે દરમિયાન ભાજપના મહિલા કોર્પોરેટર જેલમ બેન ચોકસી નો પુત્ર કુણાલ ચોકસી દારૂ પીધેલી હાલતમાં પોલીસના હાથે ઝડપાઇ ગયો હતો અને તેને સીટી પોલીસ સ્ટેશન લઈ જવામાં આવ્યો હતો.

આ કિસ્સાની જાણ ભાજપના મહિલા કોર્પોરેટર જેલમ બેન ચોકસીને થતા તેઓ તેમના પરિવારજનો  સાથે પોલીસ સ્ટેશન પહોંચી ગયા હતા અને પોલીસ કર્મચારીઓને દારૂ પીવાનો કોઈ મોટો ગુનો નથી કે તમે બધા તેને ફરી વળ્યા છો દૂર હટી જાઓ તેમ કહી હોબાળો મચાવ્યો હતો જે અંગેનો વિડીયો પણ વાયરલ થયો હતો.

પોલીસ સ્ટેશનમાં આવીને ભાજપ મહિલા કોર્પોરેટર જેલમ બેન ચોકસીએ તેમના દીકરાને માર્યો છે તેમ કહી હાજર રહેલા પોલીસ કર્મચારીઓનો ઉધડો લીધો હતો તે સમયે  કુણાલ ચોકસીને કસ્ટડીમાં લઇ જતા તેનો હાથ પકડતા જેલમ બેન ફરી ગુસ્સે થઈ હાથ પકડતા નહીં તેમ કહી હોબાળો મચાવ્યો હતો તેની સામે પોલીસ ના કર્મચારીઓએ પણ સ્પષ્ટ જણાવ્યું હતું કે તમે દાદાગીરી કરો છો યોગ્ય નથી તમે કોર્પોરેટર છો એટલે શું થઈ ગયું તેમ કહેતા બંને વચ્ચે ઉગ્ર બોલાચાલી થઇ હતી.

દારૂ પીધેલી હાલતમાં ઝડપાયેલા કુણાલ ચોકસી સામે આખરે પોલીસે ગુનો દાખલ કરી કાયદેસરની કાર્યવાહી કરી હતી એટલું જ નહીં તેને છોડાવવા માટે પણ ભાજપના કેટલાક અગ્રણીઓએ પણ દબાણ કર્યું હોવાનું બહાર આવ્યું છે.